2026 жылдың алғашқы төрт айында Бірыңғай жинақтаушы зейнетақы қорының (БЖЗҚ) активтері 171 млрд теңгеге немесе 0,7%-ға азайып, 1 мамырдағы жағдай бойынша 25,72 трлн теңгені құрады, – деп хабарлайды Aikyn.kz сайты.
Бұл кезеңде қордың таза инвестициялық кірісі 2,4 млрд теңге көлемінде теріс көрсеткіш көрсетті.
Қаржы нарығын реттеу және дамыту агенттігінің мәліметінше, зейнетақы жинақтарының номиналды көлемі жыл басынан бері 499 млрд теңгеге (2%) өсіп, 25,71 трлн теңгеге жеткен. Алайда жарналардан түскен қаражат төлемдердің артуы мен инвестициялық шығындардың әсерінен толық өтеліп отыр.
Сарапшылардың айтуынша, қор активтеріне халықтың зейнетақы қаражатын мерзімінен бұрын пайдалануы да ықпал етуде. Жыл басынан бері зейнетақы төлемдерінің жалпы көлемі 522,7 млрд теңгеге (5,4%) өсіп, 10,17 трлн теңгеге жеткен.
Зейнетақы жинақтарының басым бөлігі тұрғын үй жағдайын жақсартуға жұмсалған. Бұл мақсатқа қазақстандықтар 4,83 трлн теңге бағыттаған, бұл төрт ай бұрынғы көрсеткіштен 205 млрд теңгеге көп. Емделуге жұмсалған қаражат көлемі 1 трлн теңгеге жетсе, сақтандыру ұйымдарына зейнетақы аннуитеті бойынша аударылған қаражат 12,6%-ға өсіп, 1,42 трлн теңгені құрады.
