Қазақстан футболының белгілі маманы Самат Смақов «Атырау» футбол клубының бас бапкері болып тағайындалды, – деп хабарлайды Aikyn.kz сайты.
Бұған дейін «Атырау» клубы Владимир Чебуринмен келісімшартты 7 тамызда тараптардың өзара келісімі бойынша тоқтатқанын мәлімдеген еді. Кейін беларусьтік маман бұл шешім команданың басшылығындағы өзгерістерге байланысты қабылданғанын түсіндірді.
Самат Смақовтың бапкерлік тәжірибесі де бар. Ол Шымкенттің «Ордабасы» клубының жаттықтырушылар штабында қызмет атқарып, кейін Семейдің «Елімай» командасын басқарды. Смақовтың жетекшілігімен «Елімай» Қазақстан Премьер-лигасына жолдама алды.
Сонымен қатар ол елордалық «Астана» клубында техникалық директор қызметін атқарып, Талдықорғанның «Жетісу» командасын жаттықтырған.
Смақов футболшы ретінде де Қазақстан футболының тарихында өзіндік із қалдырды. Ұлттық құрама сапында 76 матч өткізген ол Қазақстан чемпионы атағын алты рет жеңіп алды. Сондай-ақ елдің үздік футболшысы аталымында төрт рет топ жарды.
Енді тәжірибелі маманның алдында жаңа әрі күрделі міндет тұр. Қазіргі таңда «Атырау» Премьер-лигада 19 матчтан кейін 19 ұпаймен 13-орында келеді.
Самат Смақов команда тізгінін турнирлік жағдай күрделенген тұста қолға алды. Сондықтан жаңа бас бапкердің басты мақсаты – «Атыраудың» нәтижесін жақсартып, команданың Премьер-лигадағы орнын сақтап қалу.
