Астанада FEI Jumping World Challenge Final 2026 турнирінің алғашқы іріктеу жарысы өтті, – деп хабарлайды Aikyn.kz сайты.
Бұл сын Challenge финалы аясындағы маңызды халықаралық старттардың бірін бастап берді.
115 см биіктіктегі кедергілер бағыты жарыстың алғашқы күніндегі негізгі бәсекелердің бірі болды. Аренаға шыққан спортшылар дәлдік, жылдамдық, сенімді техника және атпен үйлесімді қимыл көрсету бойынша сынға түсті. Мұндай бағытта қашықтықты таза өту ғана емес, әр кедергідегі есеп, қарқынды дұрыс ұстау және бүкіл маршрут бойындағы тұрақтылық ерекше маңызды.
Жарысқа халықаралық деңгейдегі спортшылар қатысып, Астанада өтіп жатқан FEI Jumping World Challenge Final 2026 финалының шымылдығын әсерлі түрде ашты. Турнир атмосферасы спорттық бәсекенің қызуын, жоғары ұйымдастыру деңгейін және көрерменнің ат спортына деген ерекше ықыласын бір арнаға тоғыстырды.
Жарыс нәтижесі:
1-орын — Бекзод РОЗМУХАМЕДОВ (FLORIZELL)
2-орын — Бернардо КРАУС ГЕРРА (OLZA)
3-орын — Эйми КОЛЛИНСОН (HI DIARADO)
FEI Jumping World Challenge Final 2026 Қазақстанда алғаш рет өтіп жатыр. Бұл — отандық ат спорты үшін маңызды халықаралық оқиға. Турнир спортшыларды, ресми өкілдерді, мамандарды және халықаралық ат спорты қауымдастығының қонақтарын бір алаңда тоғыстырып, еліміздегі осы бағыттың дамуына жаңа серпін береді.
