ШҚО-да полицейлер анасы мен балаларын түтін басқан үйден аман алып қалды, – деп хабарлайды kazlenta.kz тілшісі Polisia.kz сайтына сілтеме жасап.
ШҚО ПД Ұлан ауданы ПБ-ның учаскелік полиция инспекторы Бақытжан Өтеулин мен жүргізуші Алтынбек Мязев бір отбасыны түтіндеген үйден құтқарып қалды.
Қасым Қайсенов кентінде полиция қызметкерлері “Учаске” іс-шарасы барысында үйлерді аралау жүргізген кезде, Байдельдинов көшесіндегі үйден көшеге жүгіріп шығып, көмек сұраған қызды кездестірген. Ол үйде жылу жүйесі апатынан бөлме түтінге толып, оның отбасының өміріне қауіп төніп тұрғанын айтқан. Тәртіп сақшылары дереу үйге кіріп, балалары бар әйелді далаға алып шықты.
Бұл жағдайға бітеліп қалған құбыр және бу жіберетін қазанның дұрыс жұмыс істемеуі себеп болған.
– Біз бірден әрекет етіп, отбасын қауіпсіз жерге шығарып, түтіннің шығу жолын жойдық. Ең бастысы – қайғылы жағдайдың алдын алып, уақытында үлгердік, – деп атап өтті полиция қызметкері Бақытжан Өтеулин.
Ана ауыр зардаптардың алдын алған полиция қызметкерлеріне алғысын айтып, ризашылығын білдірді.
Бақытжан Өтеулин мен Алтынбек Мязевтің әрекеті полиция қызметкерлерінің адалдығы мен жауапкершілігінің үлгісі болды.
