СҚО-да полицейлер трассада кетіп бара жатқан есірткілік масаң күйдегі жүргізушіні ұстады, – деп хабарлайды kazlenta.kz тілшісі Polisia.kz сайтына сілтеме жасап.
Демалыс күндері солтүстікқазақстандық полицейлер күшейтілген түрде қызмет атқарады. 15 наурызда басталған “Құқықтық тәртіп” жедел-профилактикалық іс-шарасы шеңберінде полиция қызметкерлері есептегі тұлғаларды тексеріп, қоғамдық орындардағы қауіпсіздікті бақылау шараларын қолға алмақ.
Жүргізушілердің жолдағы тәртібін нығайту да басты назарда. 13 наурыз күні Көкшетау – Рузаевка автожолында 46 жастағы жүргізуші басқарып келе жатқан Audi автокөлігі тоқтатылды. Жүргізушінің көлікті басқаруы күмәнді көрінгендіктен, полицейлерге оны тоқтатты. Оған медициналық куәландырудан өту ұсынылды. Нәтижесінде ер адамның есірткілік масаң күйде екені анықталды. Ол 15 тәулікке әкімшілік қамаққа алынып, 7 жылға көлік жүргізу құқығынан айырылды.<!–more–>
– Жыл басынан облыс жолдарында 39 жол-көлік оқиғасы тіркелді, салдарынан 7 адам көз жұмды, 65 адам жарақаттар алды. Ал 6 адам қаза тауып, 41 адам жарақаттанған 18 жол апаты республикалық маңыздағы жолдарда тіркелді. 2 айдың ішінде облыс аумағында апаттылыққа тікелей әсер ететін жол жүрісі қағидаларының 5 мыңға тарта бұзушылығы анықталды. Әрбір бұзушылық салдары ауыр болатын жол апаттарына алып келуі мүмкін екенін естен шығармаңыздар. Жол-көлік оқиғасын болдырмау үшін және жол қозғалысының қатысушыларының қауіпсіздігін нығайту үшін күшейтілген жұмыстар жалғасын табады, – дейді СҚО ПД жергілікті полиция қызметі басқармасы бастығының міндетін атқарушы Александр Розбах.
