CNBC деректеріне сүйенген Aikyn.kz робототехника нарығындағы жаңа үрдістің себебін түсіндіреді.
Microduck-ті Hugging Face-тің француздық бөлімшесі Pollen Robotics әзірледі. Түрлі-түсті үйрек пішініндегі робот бейсенбі күні (27 тамыз) таныстырылған. Содан бірнеше күнде оның 10 мыңнан астам данасы сатылып, компанияға 4 млн доллар табыс әкелген. Сұраныстың жоғары болғаны сонша, бастапқыда 2026 жылғы Рождествоға дейін жеткізіледі деп жоспарланған жаңа тапсырыстардың мерзімі кейінге шегеріле бастаған.
Салмағы небәрі 800 грамм болатын Microduck – бір жағынан интерактивті ойыншық, екінші жағынан бағдарламалық өнімдер әзірлеуге арналған шағын роботтық платформа. Ол сенсорлармен, қозғалтқыштармен және жеке есептеу жүйесімен жабдықталған. Ашық бастапқы кодты бағдарламалық жасақтаманың көмегімен роботты виртуалды симуляциялар мен нақты нұсқаулар арқылы үйретуге болады.
Құрылғының негізгі есептеу компоненті – Қытайдың Шанхай биржасында тіркелген Rockchip компаниясының RK3566 микросхемасы. Бұл чипте британдық ARM компаниясының лицензияланған технологиясы қолданылады. Осылайша, франко-америкалық компания әзірлеген өнімнің ішінде қытайлық процессор мен британдық технологияның қатар қолданылуы әлемдік технологиялық жеткізу тізбектерінің әлі де өзара тығыз байланыста екенін көрсетеді.
Omdia компаниясының бас сарапшысы Лянь Цзе Судың айтуынша, Rockchip – есептеулерді бұлтқа жібермей, тікелей құрылғының өзінде орындайтын ЖИ шешімдерінің «негізгі жеткізушілерінің» бірі. Компанияның чиптері нысандарды анықтау және кескіндерді тану сияқты машиналық көру жүйелерінде кеңінен қолданылады.RK3566 аса күрделі генеративті ЖИ жүйелеріне арналмаған. Сарапшының сөзінше, бұндай міндеттер үшін оның есептеу қуаты жеткіліксіз. Ал қуатты edge AI чиптері болашақта смартфондар, роботтар және басқа құрылғыларға пайдаланушы деректерін интернетке жіберместен, генеративті ЖИ модельдерін іске қосуға мүмкіндік береді.
Rockchip-тің қаржылық көрсеткіштері де бұл нарықтағы сұраныстың өскенін аңғартады. Компанияның бірінші жартыжылдықтағы операциялық кірісі бір жыл бұрынғы кезеңмен салыстырғанда 40%-ға өсіп, 428 млн долларға жеткен. Бір реттік баптарды есептемегендегі таза пайдасы 60%-дан астам артқан.
Microduck – Hugging Face былтыр сатып алған Pollen Robotics стартапының екінші роботы. Екі компанияның алғашқы бірлескен роботы өткен жылдың көктемінде шығарылып, оның да сатылымы 10 мың данадан асқан.
Microduck нарықтағы бұндай жалғыз өнім емес. Қытайлық Zeroth стартапы биыл жазда бала бойындай гуманоид роботты 1 323 долларға ұсынды. Ал Mondo Robotics компаниясының Wall-E стиліндегі шағын роботы Kickstarter де бастапқы 50 мың долларлық мақсатын 80 еседен астам орындады. Оның алғашқы сатып алушыларға арналған бағасы 549 доллардан басталады.
Microduck-тің жылдам сатылуы жеке роботтардың тек зертханалар мен кәсіпорындарға арналған технология емес, қарапайым тұтынушы сатып ала алатын өнімге айналып келе жатқанын байқатты. Сонымен бірге оның ішіндегі қытайлық Rockchip пен британдық ARM технологиялары робототехникадағы халықаралық өндірістік байланыстардың маңызын айқын көрсетіп отыр.
