Премьер-Министрдің орынбасары Серік Жұманғарин тауарларды міндетті таңбалау қорытындылары мен пилоттық жобаларды іске асыру барысы жөнінде кеңес өткізді, деп хабарлайды kazlenta.kz.
Қаржы министрлігінің ақпараты бойынша 2019 жылы темекі өнімдерін міндетті таңбалау енгізілгеннен кейін темекінің барлық түрі бойынша акциз түсімі 46,8%-ға, 191,5 млрд теңгеден 2023 жылы 281,1 млрд теңгеге дейін өсіп отыр.
Тауарларды таңбалап, қадағалайтын ақпарат жүйесіне бүгінде темекі өнімдері бойынша 43 284 қатысушы тіркеліп, 4,1 млрд таңбалау коды енгізілді. 2022-2023 жылдары 12 млрд теңгеден астам сомаға заңсыз темекі өнімі анықталды.
Аяқ киім өнімдері бойынша ақпарат жүйесіне 3 745 қатысушы тіркеліп, 90,5 млн код енгізілді. Бұл ретте импорттық аяқ киімнен түсетін ҚҚС және кеден бажы 2021 жылы 7,8 млрд теңгені, 2022 жылы 26,4 млрд теңгені (3 еседен астам немесе 338%-ға өсті), 2023 жылы 30,7 млрд теңгені құрады (2022 жылға қарай өсім – 16%).
Міндетті таңбалаудың мұндай нәтижелері сауданы көлеңкелі нарықтан шығару динамикасының жақсарып келе жатқанын көрсетеді.
2024 жылғы 1 шілдеден бастап пилоттық жоба аяқталып, дәрі-дәрмектердің (7 124 түрі) бөлшек және көтерме саудасы міндетті таңбалауға көшуі тиіс. Әр ауыл мен қалада дәрі-дәрмектерді үздіксіз сатудың әлеуметтік маңызын ескере отырып, Серік Жұманғарин Сауда және интеграция министрлігіне «Қазақтелеком» АҚ және банктермен бірлесе отырып, дәрілік заттарды таңбалаудың бизнес-процесін сынақтан өткізу үшін медициналық мекемелерді, дәріханаларды аралап шығу туралы тапсырма берді.
Қазіргі уақытта дәрілік заттар бойынша тауарларды таңбалап, қадағалайтын ақпарат жүйесіне 563 қатысушы тіркеліп, 19 млн таңбалау коды берілген. Сондай-ақ 2024 жылғы 1 шілдеден бастап зергерлік бұйымдарды міндетті таңбалау енгізілетін болады.
2024 жылғы ақпан айынан бастап сыра сусындары мен мотор майын таңбалап, қадағалау бойынша пилоттық жобалар басталады.
